أبتسم أنت فى كلية التعليم الصناعى .*/ 1- لما تدرس 14 ماده فى 4 سنين يعنى 56 ماد

من طرف **مصراوى22** السبت أكتوبر 01, 2011 7:25 pm

أبتسم أنت فى كلية التعليم الصناعى .*/

1- لما تدرس 14 ماده فى 4 سنين يعنى 56 ماده دراسيه منهم 48 ماده هندسيه (جامعة حلوان)ويجى واحد يقولك انت مدرس فلازم تعرف انت فى كلية التعليم الصناعى .

2- لما دكاتره هندسه يدخلوا يدوا محاضرات فى عينيهم اشمئزاز من الطلبة وكأن مش من حقنا ندخل جامعه اصلا رغم ان مهندسين المانيا (اوعدنا يارب) تعليم فنى كلهم يبئى انت أكيد فى كلية التعليم الصناعى .

3- لما يجيلك دكاتره هندسه يدولك رياضه ولا فيزياء ولا ميتالوروجى ولا اختبارات مواد وهم متضررين من دخول الكلية اصلا ويعاملوك على انك متخلف من طبقة تانيه مش من حقك اى شىء وخساره فيك حتى الهواء اللى بتتنفسه فلازم تعرف انك فى كلية التعليم الصناعى .

4- لما تشيل فيزياء ولا كمياء ولا موائع ولا ثرومو كذا سنه ورا بعض أودكتور الفيزياء يدخل المحاضره وهو قرفان من الطلبه ولو حد فكر ينطق يطرده شر طرده فلازم تعرف انك فى كلية التعليم الصناعى .

5- ولما تلاقى وشوش البنات ماتفرقش كتير عن الصبيان ألافى حالات نادره فلازم تعرف انك فى كلية التعليم الصناعى .

6- ولما تلاقى ان الطلبة المغتربين اكتر من الطلبه اللى من المكان نفسه يبئى انت فى كلية التعليم الصناعى .

7- ولما تلاقى الطلبة جاية من الاقاليم مصلحتهم قبل كل شىء وشعارهم الجحيم هم الاخرون ويعملوا تكتلات فى الكلية لازم تعرف انك فى كلية التعليم الصناعى .

8- لما تعمل مشروع تخرج هندسي بحت ويطلع عينك من البحث فى المراجع وعلى النت وتروح اماكن تجيب داتا أو تصور صور للمشروع وفى مكتبات كليات الهندسه عشان مكتبة كليتك بتكح تراب ويناقشك فيه دكاتره مهندسين وتجيب تقدير امتياز وجيد جدا ويتقالك فى الاخر انت مدرس برده فلازم تعرف انك فى كلية التعليم الصناعى .

9- لما يدولك بكالوريوس تكنولوجيا عشان خايفين يقولولك انك مهندس بدليل دراستك ويقولك انت برده مدرس فلازم تعرف انك فى كلية التعليم الصناعى .

10- بعد لما تخلص وماتلاقيش نقابة تضمك ليها زى أى كلية عمليه رغم دراستك الهندسيه الصريحه فلازم تعرف انك أتخرجت من كلية التعليم الصناعى .

11- لما تيجى تشتغل فى مكان ويقولوك انت مؤهل متوسط واشغلك فنى ويحرقوا دمك مع انك خريج جامعى فى تخصص هندسى بدليل دراستك فلازم تعرف انك اتخرجت من كلية التعليم الصناعى .

12- ولو لاقدر الله سقطتلك سنتين او 3 ويدولك اختيارات تحويل تجاره او حقوق او اداب وبرده الناس مصره على انك دبلوم صنايع ومؤهل متوسط فلازم تعرف انك كنت فى كلية التعليم الصناعى .

14- لو فكرت تتجوز وربنا قدرك وأخذت القراروتيجى ام العروسه تقولك انت ايه يابنى دبلوم صنايع وجاى تتقدم لبنتى مش تخلى عندك نظر وهى بتبصلك بقرف فلازم تعرف انك اتخرجت من كلية التعليم الصناعى .

15-الاهم انك لما تدخل أى منتدى فيه كليات كتير وتبص على أخر كليه من غيرما تفكر لازم تعرف انك هاتقرا اسم كلية التعليم الصناعى مش كده ولا غلط ؟! . (الا المنتدى ده بصراحه رفع من روحنا المعنويه شويه)

وهذا حدث بالفعل مره كان الطلبة بتؤدى التربيه العسكريه فى الجامعه وطبعا كل الكليات بتكون مع بعض و أحد طلبة الكليات دى راح باعت ورقه للقائد مكتوب فيها احنا طلبة جامعيين ازاى تقعدونا مع الناس دى ؟!!!
طبعا واحد من الطلبه المثقفين جدا قام رد والناس كلها سقفت للرد ده والحمد لله بس الموقف ده يعدى كده يعنى ونفضل ساكتين ؟؟؟.

والمهزله مستمره فلازم تعرف انها كلية التعليم الصناعى ولا عزاء

بسم اله الرحمن الرحيم
(ان الله لايغير مابقوم حتى يغيروا ما بانفسهم) صدق الله العظيم